Act 21 | BOJ | STEP | Iga qobuŋ na aisim Kos nui buŋyosim aisim nebeonaqa Rodes nuiq di tiryonam olo nebeej. Nebeonaqa iga Rodes nui uratosim aisim Patara qureq di tiryem.

Acts 21

Pol a qobuŋ gogetosiqa Jerusalem qureq gilej

1 Iga qobuŋ na aisim Kos nui buŋyosim aisim nebeonaqa Rodes nuiq di tiryonam olo nebeej. Nebeonaqa iga Rodes nui uratosim aisim Patara qureq di tiryem. 2 Dia qobuŋ bei Fonisia sawaq gilqa laqnaqa iga qobuŋ di gogetosim gilem. 3 Iga qobuŋ na gilsim Saiprus nui jojomyosim baŋ qonaŋq waiysim buŋyosim gilem. Gilsim Siria sawa buŋyosim Tair qureq di tiryem. Dia tamo qobuŋq di wauo qaji naŋgi na iŋgi iŋgi kalil waŋgarosib mandamq di ateleŋeb. 4 Qure dia iga na Kristen tamo qudei naŋgi itnjrsimqa bati 7-pela naŋgi koba na soqnem. Sonamqa Qotei aqa Mondor na anjam ubtosiqa naŋgi endegsi minjrej, “Pol a Jerusalem dia gulube koba itqas.” Degsi minjrnaq qusibqa Pol minjoqneb, “Ni Jerusalem aiaim.” Onaqa Pol a kamba minjroqnej, “Sai. E Jerusalem aiqai.” 5 Ariya bati 7-pela koboonaqa iga Pol ombla na qure di uratosim qobuŋ gogetqa marsim alile aiem. Kristen tamo uŋgasari naŋgo aŋgro ti naŋgi na iga suweigosib alile aisim dia iga koba na siŋga pulutosim Qotei pailyem. 6 Pailyo koboonaqa iga naŋgi baŋ ojsimqa minjrem, “Niŋgi bole soqniye.” Onaqa naŋgi na iga mergeb, “Niŋgi aiiye.” Degsi mergonab iga qobuŋ gogeteqnamqa naŋgi olo puluosib naŋgo qureq gileb.

Sisaria qureq dia Qotei aqa medabu o qaji tamo bei Agabus a na Pol anjam bei minjej

7 Ariya iga qobuŋ na Tair qure uratosim aisim Tolemes qureq di tiryem. Tiryosim dia Kristen naŋgi itnjrsimqa bati qujai naŋgi koba na soqnem. 8 Nebeonaqa iga Tolemes qure uratosim walwelosi aisim Sisaria qureq di brantem. Brantosim Yesus aqa anjam maro tamo bei aqa ñam Filip aqa talq gilsimqa a ombla soqnem. Nami Jerusalem dia tamo 7-pela naŋgi iŋgi jeio wau yqajqa giltnjreb deqaji bei agi Filip. 9 Filip aqa asi qolqe naŋgi a ombla soqneb. Naŋgi Qotei aqa medabu o qaji uŋa.

10 Bati qudei iga Sisaria qureq di sonamqa Qotei aqa medabu o qaji tamo bei aqa ñam Agabus a Judia sawaq dena walwelosiq gagoq bej. 11 Bosiqa Pol aqa alalag yaiyosiqa qombilgej. Qombil aqa utru agiende. Agabus na Pol aqa alalag osiq aqa segi baŋ ti siŋga ti alalag dena qosej. Osiqa mergej, “Qotei aqa Mondor na e endegsi merbqo, ‘Jerusalem qureq dia Juda naŋgi na tamo alalag endi tigeqnu qaji aqa siŋga ti baŋ ti endegsib qosqab. Osib tamo di osi gilsib sawa bei bei qaji tamo naŋgo baŋq di atibqa naŋgi na a ugeugeiyqab.’” Dena qombil osorgej.

12 Onaqa iga Agabus aqa anjam di qusimqa iga ti tamo uŋgasari qudei qure dia soqneb qaji naŋgi ti Pol minjoqnem, “Ni Jerusalem aiaim.” 13 Onaqa Pol na iga mergej, “Niŋgi kiyaqa akamoqnsib are gulubetetbeqnub? E Tamo Koba Yesus aqa ñam qa tonto talq waibqab di kere. Aqa ñam qa e lubib moiqai di dego kere. E gulube di uratqasai. E itqai.” 14 Pol a degsi gago anjam quqwa uratosiq mergonaqa iga na olo saidyosai. Iga marem, “Uŋgum. Pol a Tamo Koba Qotei aqa areqalo dauryosim Jerusalem aiem.”

Pol a Jerusalem qureq di brantej

15 Ariya bati qudei koboonaqa iga Jerusalem aiqa marsimqa gago iŋgi iŋgi kalil gereiyosim tigelosim aiem. 16 Aiqa yeqnam Sisaria tamo qudei Yesus dauryoqneb qaji naŋgi na iga suweigosib koba na aisim Jerusalem qureq di brantem. Brantosim naŋgi na iga tamo bei aqa ñam Nason aqa talq dia uratgosib olo pulueb. Deqa iga Nason ombla aqa talq di soqnem. Nason a nami Yesus dauryoqnsiq soqnej. Aqa qure utru Saiprus. 17 Ariya iga Jerusalem di brantonamqa Kristen was naŋgi na iga nugsibqa tulaŋ areboleboleinjrnaqa iga osib geregereigeb.

18 Nebeonaqa iga Pol ombla na Jems unqajqa aqa talq gilem. Kristen gate kalil naŋgi Jems koba na koroesonab iga gilsim tal gogetosim naŋgi itnjrem. Nami Qotei na Pol qariŋyonaqa a sawa bei beiq dia laqnsiqa tamo uŋgasari naŋgi Yesus aqa anjam minjre minjre laqnej. Deqa a Jerusalem dia Kristen gate naŋgi itnjrsiqa aqa wau deqa naŋgi sainjrej.

Kristen gate naŋgi na Pol minjeb, “Ni atra tal miligiq gile.”

20 Onaqa naŋgi Pol aqa anjam di qusibqa naŋgi tulaŋ areboleboleinjrnaqa Qotei aqa ñam soqteb. Osib Pol minjeb, “O gago was Pol, ni qalie, Juda tamo uŋgasari tulaŋ gargekoba naŋgi are bulyoqnsibqa Yesus qa naŋgo areqalo siŋgilateqnub. Naŋgi Moses aqa dal anjam dauryqajqa dego tulaŋ siŋgilaeqnub. 21 Deqa tamo qudei naŋgi na ino jejamu laŋa gisaŋyoqnsib Juda naŋgi endegsib minjreqnub, ‘Pol a na Juda tamo uŋgasari sawa bei beiq di unub qaji naŋgi Moses aqa dal anjam dauryqa saidnjroqnsiq endegsi minjreqnu, “Nuŋgo aŋgro naŋgi muluŋ breinjraib. Juda kumbra dego Moses nami merŋgej qaji di uratiye. Di dauryaib.” ’ Naŋgi degsib ino jejamu laŋa gisaŋyoqnsib Juda tamo uŋgasari naŋgi minjreqnub. 22 Iga qalie, Juda naŋgi quqwab, ni Jerusalem bonum. Qusibqa ni qa are ugeinjrqas. Deqa iga kierqom? 23 Od, iga ni endegsi mermim ni degye. Gago ambleq endia Juda tamo qolqe unub. Naŋgi gago Juda kumbra dauryosib Qotei pailyqa osib naŋgo gate baŋga ti mejuŋgum ti urateb unub. 24 Deqa ni naŋgi joqsim atra tal miligiq gilsim une kobotqajqa kumbra Moses a nami marej qaji di naŋgi koba na dauryosib yiye. Osim wagme awaiyetnjrimqa naŋgi na Qotei atraiyosib naŋgo gate baŋga ti mejuŋgum ti joqwab. Ni degyimqa Juda tamo kalil naŋgi ni numsib endegsib qalieqab, ‘Bole, Pol a dego Moses aqa dal anjam dauryo qaji tamo. Anjam naŋgi a qa mareqnub qaji di bolesai.’ Naŋgi degsib qalieosib ni qa boleqab. 25 Ariya iga nami anjam endegsim neŋgreŋyosim sawa bei bei qaji tamo uŋgasari Yesus qa naŋgo areqalo siŋgilato qaji naŋgi qa qariŋyem, ‘Niŋgi na qotei gisaŋ atrainjro qaji iŋgi bei uyaib. Wagme leŋ ti uyaib. Wagme sil na kakoro tontnjrnab moreŋeb qaji di uyaib. Sambala kumbra dego yaib.’ Iga nami anjam degsim keretosim neŋgreŋyosim naŋgi qa qariŋyem.” 26 Onaqa Pol a Kristen gate naŋgo anjam di qusiqa minjrej, “Od, e nuŋgo anjam di dauryqai.” Osiqa nebeonaqa a na tamo qolqe naŋgi di joqsiqa atra tal miligiq gilsiq une kobotqajqa kumbra Moses a nami marej qaji di naŋgi koba na dauryosib yeb. Osiqa atra tamo gate endegsi minjej, “Bati 7-pela koboamqa e na gago segi segi wagme osiy Qotei atraiyqai.”

Juda tamo qudei naŋgi atra tal miligiq dia Pol ojeb

27 Ariya bati 7-pela di koboqa laqnaqa Juda tamo qudei Esia sawaq dena beleŋeb qaji naŋgi Pol a atra tal miligiq di sonaq unsibqa bosib a ojeb. Ojsib murqumyoqnsib Juda tamo uŋgasari kalil naŋgo areqalo ugetetnjrqa marsibqa Pol aqa jejamu laŋa gisaŋyosib minjreb, “O Israel tamo uŋgasari, niŋgi kalil bosib iga aqaryaigosib Pol qalib moiqas. Pol a sawa sawa kalilq dia iga Juda qa ti Moses aqa dal anjam qa ti atra tal qa ti misiliŋ anjam mareqnaqa tamo uŋgasari kalil queqnub. Di segi sai. A dego Grik tamo qudei naŋgi joqsiqa koba na atra tal miligiq gileb. Aqa kumbra dena a na Qotei aqa atra tal di ugetej.” 29 Naŋgi na degsib minjreb. Di kiyaqa? Nami Efesus tamo bei aqa ñam Trofimus a Pol ombla na Jerusalem qureq dia laqnabqa unjrsib are qaleb, “Pol a tamo di osiqa atra tal miligiq gilej.” Degsi are qalsib deqa minjreb.

30 Onaqa tamo uŋgasari kalil Jerusalem qureq di soqneb qaji naŋgi anjam di qusibqa minjiŋ oqetnjrnaqa leleŋkobaoqnsibqa gurgur ti atra tal miligiq gilsib Pol ojeb. Ojsib giriŋyosib oqeq atsib atra tal aqa siraŋme kalil kabuteleŋeb.

Rom qaja tamo naŋgi bosib Pol olo eb

31 Osib naŋgi Pol moiotqa marsibqa baŋ na qaloqneb. Onaqa Rom qaja tamo naŋgo gate koba a anjam endegsi quej, “Juda tamo uŋgasari kalil naŋgi minjiŋ oqetnjrqoqa murqumyeqnub.” 32 A degsi qusiqa aqa qaja tamo qudei naŋgo gate naŋgi ti joqsiqa gurgur ti tamo uŋgasari naŋgo ambleq ainabqa unjrsibqa Pol qalqa urateb. 33 Onaqa qaja tamo naŋgo gate koba a bosiqa Pol ojsiqa aqa qaja tamo naŋgi minjrej, “Sil siŋgila kokba aiyel osi bosib a tontiye.” Onaqa naŋgi bosib Pol tontonabqa qaja tamo naŋgo gate koba a na tamo uŋgasari kalil naŋgi endegsi nenemnjrej, “Tamo endi yai? A une kie yqo deqa niŋgi a qaloqnab?” 34 A na naŋgi degsi nenemnjrnaqa naŋgi olo leleŋkobaoqnsib anjam utru segi segi mareleŋoqneb. Qudei anjam bei maroqneb. Qudei anjam bei maroqneb. Naŋgi degsib mareleŋoqnsib deqa naŋgi Pol aqa une utru geregere ubtsi marqa keresai. Deqa qaja tamo naŋgo gate koba a na aqa qaja tamo naŋgi minjrnaqa naŋgi Pol osib naŋgo ŋeio talq osi gileb. 35 Osi giloqnsib naŋgo ŋeio tal jojomyeqnabqa tamo uŋgasari kalil naŋgi minjiŋ ani oqetnjrnaqa naŋgi daurnjroqnsib murqumyoqnsib maroqneb, “Niŋgi na Pol qalsib moiotiye.” Naŋgi degsib maroqneb deqa qaja tamo naŋgi na Pol soqtosib naŋgo qawarq di atsib osi giloqneb.

Pol na aqa anjam aqa utru ubtsiq Juda naŋgi minjrej

37 Osi gilsib naŋgo ŋeio tal gogeq di atqa laqnabqa Pol a Grik anjam na qaja tamo naŋgo gate koba endegsi nenemyej, “E ni anjam bei mermqa kere e?” Onaqa minjej, “Ni Grik anjam qalie e? 38 E endegsi are qalonum. Ni Isip tamo bei nami Rom ti qotqa marsiqa tigelosiq qaja tamo 4,000 joqsiqa wadau sawaq di laqnej qaji agi ni edegonum.” 39 Onaqa Pol na minjej, “E tamo di sai. E Juda tamo. Ijo qure utru Tarsus. Tarsus a qure kobaquja. A Silisia sawaq di unu. A qure ñam ti. Deqa ni mare. E na tamo uŋgasari kalil naŋgi anjam bei minjrqa kere e?” 40 Onaqa qaja tamo gate a na Pol odynaqa tetaq di tigelosiqa aqa baŋ soqtonaqa tamo uŋgasari kalil naŋgi kiri kirionabqa Hibru anjam na endegsi minjrej,